Sterilisasie – die voordele en nadele

As mens sterk betrokke is by dierebeskerming, soos ek, is daar eintlik net een mening oor die sterilisasie van honde en katte, en dit is dat dit essensieel is. Stampvol diereasiele die wêreld oor bewys dat daar te veel ongewensde troeteldiere is, en te min mense wat kan/wil na hulle omsien. Party asiele sit diere na ‘n sekere tyd uit omdat daar eenvoudig nie plek is vir hulle nie. In ander lande word hulle op straat vergiftig, of versamel en vergas. Die alternatief, wat definitief nie goedkoper en makliker is nie, is om die diere te steriliseer. Baie keer kan ons dit doen voor hulle swanger (gebruik bewus nie die woord dragtig nie) geword het, of tussen swangerskappe, maar baie keer moet ons aborsies uitvoer. Hoeveel ongewenste swangerskappe het ons nie al verhoed nie? Sterilisasie is die enigste manier vir die langtermyn beheer van dierepopulasies. As die diere uit ‘n gebied verwyder word, kom daar net ander om die leemte te vul.

Daar is uitsonderings van diere wat ons dink nie voor die voet gesteriliseer hoef nie te word nie. Dit geld vir telers van terapiehonde (vir blindes, mense met outisme of Asperger’s ens.), reddingshonde en ERNSTIGE telers van gesonde, normale troeteldiere. Laasgenoemde sê ek amper met ‘n swaar hart. Alhoewel ek nie troeteldiere kan wegdink uit ons samelewing nie, is die gemors met ongewenste diere al so groot, dat daar regtig nie nodig is om nog diere te teel nie.

Boonop is dit nie so swart-wit as mens nie aspek van oorbevolking buite rekening laat nie. Daar is voordele EN nadele aan sterilisasie, waarvan ek die belangrikstes hier kort saamvat:

Voordele:

• Geen infeksie, kanker of sist formasie van eierstokke en baarmoeder nie. Pyometra is ‘n noodgeval, en kan ‘n hond se dood beteken as dit nie onmiddellik geopereer word nie.
• Minder borskanker – bei honde ‘n afname van tot 99.5% as dit voor die eerste hitte gedoen word. Sterilisasie na die tweede hitte of na ongeveer 2.5 jare het minder van ‘n invloed. Dieselfde geld vir katte.
• Minder gevalle van prostatitis (infeksie van die prostaatkliere) en verwante siektes by manlike diere
• Baie gedragsprobleme word so uitgeskakel, soos aggressie en rondlopery. Ongewensde gedrag rondom die hitte-periode word ook so vermy. Baie katte wat hulle merk op ongewensde plekke los, hou daarmee op, maar die oorsaak kan ook iets in die omgewing wees, wat kastrasie nie kan oplos nie.
• Diere lewe langer
• Minder ongewensde diere

Nadele

• Verhoogde kans (30%) vir ‘n lekkende blaas by honde wat meer as 20 kg weeg, as die sterilisasie te vroeg gedoen word. Daar is honde wat meer geneig is daartoe soos Bokser, Doberman, Bobtail, reuse Schnauzer en Rottweiler. Die toestand kan egter met medisyne behandel word.
• Gewigstoename. Alhoewel dit ‘n probleem kan wees, kan dit beheer word deur kos en aktiwiteit aan te pas. Deur gekontroleerde maaltye deur die dag te gee (i.p.v. kos heeltyd beskikbaar maak), en te gaan stap en/of speel met jou troeteldiere, kan oorgewig beperk word.
• Verandering die kwaliteit van die pels. Dit gebeur baie selde en eerder by Spaniël honderasse.
• Daar is studies wat wys dat Labradors en Golden Retrievers ‘n verhoodge kans het vir heup- en knieprobleme na kastrasie. Die kans is normaalweg omtrent 5% vir sulke probleme sonder kastrasie, en verhoog dan daarna, veral as die diere te vroeg gesteriliseer word. Ook sekere kankers neem by wyfiehonde van die rasse toe na kastrasie (maar ander kankers neem weer af met kastrasie!). Dit blyk of die rasse vatbaar is vir kanker met die verwydering van eierstokke en die gepaardgaande hormone (Hart et al.,

  PLoS ONE 9(7): e102241. doi:10.1371/journal.pone.0102241)

   

So, alhoewel die situasie nie duidelik swart-wit is nie, is die aanbeveling steeds dat elke hond en kat wat nie hoef te teel nie, reggemaak behoort te word. Die verskonings dat mens se dier eers moet kleintjies kry om haar persoonlikheid te ontwikkel of die wonder van geboorte vir kinders te wys, is verkeerd en dra by tot die gemors met ongewensde diere wat ons tans het.

Gaan kyk gerus ook na die webwerf van Be Wise, Sterilise: https://www.sterilise.co.za/ wat hulle beywer daarvoor om soveel as moontlik honde en katte te steriliseer. Dankie Hester van Dis Ekke vir die informasie.